Բազմոց խոհանոցում․ ինչին ուշադրություն դարձնել
Ժամանակակից ինտերիերներում բազմոց կարելի է հանդիպել գրեթե ամենուր՝ հյուրասենյակից մինչև պատշգամբ։ Կահույքի այս ունիվերսալ մասն առանձնանում է ոչ միայն իր հարմարավետությամբ, այլ նաև ֆունկցիոնալությամբ։ Որոշ մոդելներ ունեն տարողունակ պահոցներ, իսկ որոշներն էլ հեշտությամբ վերածվում են մահճակալի։
Խոհանոցը տան ամենամտերմիկ սենյակներից մեկն է, և այստեղ բազմոցի կիրառումը, կարելի է ասել, շատ տեղին է։ Այն խոհանոցը դարձնում է ավելի հարմարավետ ու հյուրընկալ, հնարավորություն տալիս հանգստանալ ուտեստ պատրաստելու ընթացքում, սուրճ ըմպել հաճելի պայմաններում։
Որտե՞ղ և ինչպե՞ս տեղադրել բազմոցը
Երբ խոհանոցն առանձին է հյուրասենյակից, ապա բազմոց ընտրելիս անչափ կարևոր է հաշվի առնել սենյակի չափերը։ Բազմոցը պետք է ստեղծի հարմարավետ անկյուն, ոչ թե անհարմարություն պատճառի սենյակում անցուդարձին։
Օրինակ՝ նեղ ու երկար խոհանոցների դեպքում կարելի ընտրել այնպիսի բազմոց, որը կարող է խոհանոցային անկյունակ ծառայել կամ փոխարինել ճաշասեղանի աթոռներից մի քանիսին։
Խոհանոցում տեղադրվող բազմոց ընտրելիս կարևոր է հաշվի առնել այն հանգամանքը, որ ինչքան էլ լավը լինի խոհանոցի օդափոխության համակարգը, միևնույնն է, կերակրի հոտը, բծերը կարող են հեշտությամբ հայտնվել կահույքի վրա։ Ուստի ցանկալի է ընտրել այնպիսի գործվածքով երեսպատված բազմոց, որը չի կլանում կեղտն ու տհաճ հոտերը, հեշտ է խնամել կամ հնարավոր է այն հանել ու լվանալ։
Երբ խոհանոցն ու ճաշասենյակը կամ հյուրասենյակը միասին են, ապա բազմոցի ընտրությունն ավելի մեծ է։ Նախ այս դեպքում հնարավոր է ավելի մեծ բազմոց ընտրել, և հետո՝ բազմոցը կարելի է կիրառել որպես միջավայրը գոտիների բաժանող կահույք։
Ինտերիեր դիզայներները միացյալ խոհանոց-ճաշասենյակում կամ հյուրասենյակում խորհուրդ են տալիս բազմոցը տեղադրել այնպես, որ այն մեջքով լինի դեպի խոհանոցային կահույքը՝ այդ կերպ տարանջատելով խոհանոցը սենյակի մնացած մասից։
Ճաշասենյակի հետ միացյալ խոհանոցի դեպքում ևս կարող է աշխատող լինել ճաշասեղանի աթոռները ուղիղ բազմոցով փոխարինելու տարբերակը։ Այսպիսի կիրառումը կարող է ոչ միայն տեղ խնայել, այլ նաև ավելի կոկիկ տեսք հաղորդել սենյակին։
Նշված տարբերակներից ցանկացածի դեպքում բազմոց ընտրելիս կարևոր է հաշվի առնել ոչ միայն ինտերիերի չափերը, այլ նաև գործառույթները, որ ակնկալում են բազմոցից։
Եթե տանը հաճախ եք տեղափոխություններ կատարում, ապա նախընտրելի են ոտքերով բազմոցի տարբերակները։ Դրանց, ի տարբերություն հատակին նստող բազմոցների, ավելի հեշտ է տեղափոխելը։
Փոքր խոհանոցներում շատ ակտուալ են պահոցներ ունեցող բազմոցների տարբերակները։ Ավելի ընդարձակ սենյակների դեպքում կարող են հետաքրքիր լինել նաև մահճակալի վերածվող բազմոցները։
